محترم حضرت حکیم صاحب السلام علیکم! ہم تمام گھر والے عبقری رسالہ بڑے شوق سے پڑھتے ہیں‘ خاص طور پر جنات سےمتعلق داستانیں اور علامہ لاہوتی پراسراری صاحب کا مضمون ’’جنات کا پیدائشی دوست‘‘ تو سب سے پہلے پڑھتے ہیں۔ جنات کی حقیقت کے تو ہم چشم دید گواہ ہیں۔ واقعہ کچھ یوں ہے کہ جب میں نویں کلاس میں تھی تو میری بڑی بہن کی شادی ہوئی‘ ہمارا گھر مسجد کے ساتھ تھا کیونکہ میرے ابو وہاں پر پیش امام تھے اس مسجد کے ساتھ ایک کمرہ تھا جس میں دو جنات رہتے تھے‘ دونوں بہن بھائی تھے۔بارات والے دن جب میرا بہنوئی دولہا بن کر آیاتو مسجد کےساتھ کمرے میں موجود جنات(بہن‘ بھائی) نے جب میرے بہنوئی کو دیکھا تو اس جن کی بہن میرے بہنوئی پر عاشق ہوگئی۔ میرے بہنوئی الحمدللہ بہت خوبصورت اور نیک سیرت ہیں‘ مسجد میں ہی میرے بہنوئی کی حالت غیر ہوگئی‘ وہ وہیں بیہوش ہوگئے‘ میرے والد صاحب نے دم وغیرہ کیا تو ہوش بحال ہوئے اس وقت تو انہوں نے کچھ نہ بتایا۔اس کے بعد جب بھی سسرال آتے ان کی حالت غیر ہوجاتی جبکہ اپنے گھر وہ بالکل تندرست اور خوش رہتے۔کچھ عرصہ پہلے جب آئے تو جننی حاضر ہوگئی اور ہم سے باتیں کرنا شروع ہوگئی۔ اس نے بتایا کہ جب یہ دولہا بن کر مسجد میں نکاح کیلئے آئے تو میں اسی دن ان پر عاشق ہوگئی تھی اور آج تک ان کے ہمراہ ہوں۔ اب تو یہ کہتی ہے کہ میں آپ کے بہنوئی کے گھر ان کے ساتھ ہی چلی گئی ہوں‘ اب ادھر ہی رہتی ہوں۔ جب بھی میرے بہنوئی ہمارے گھر آتے ہیں تو یہ حاضر ہوکر سب گھر والوں سے باتیں کرتی ہے۔ سب باتوں کے بعد ایک بات ضرور کہتی کہ میری ان سے شادی کروا دو‘ ہم ہر بار انکار کردیتے ہیں۔ ابھی گزشتہ ماہ ایک اللہ والے سے دم کروایا اور انہوں نے اسے آنے سے منع کیا مگر وہ پھر بھی منع نہ ہوئی تو انہوں نے ہمیں ایک تعویذ دیا جو بہنوئی نے گلے میں پہن لیا۔ اسی وقت حاضر ہوئی اور کہنے لگے: میں آئندہ سے نہیں آؤں گی‘ نہ شادی کی خواہش کا اظہار کروں گی اور نہ ہی ان کے ساتھ ان کے گھر جاؤنگی بس مجھے ان کو دیکھنے کی اجازت دی جائے تنگ نہیں کروں گی‘ اب جب بھی بھائی آتے ہیں تو وہ محسوس کرتے ہیں کہ ان کو کوئی دیکھ رہا ہے۔